Ўзбекистонда янги таҳрирдаги Конституция кучга кирди

Ўзбекистон Марказий сайлов комиссияси 30 апрел куни ўтказилган референдум якунлари тўғрисида қарор қабул қилди.

Қарорга асосан, “Ўзбекистон Республикаси Конституцияси тўғрисида”ги Ўзбекистон Республикаси Конституциявий қонуни референдумда умумхалқ овоз бериш орқали қабул қилинган деб тан олинди.

Қонун мазкур қарор расмий эълон қилинган кун – 1 майдан эътиборан кучга кирган деб ҳисобланади.

МСК қарори билан, референдум натижалари қуйидагича бўлгани тасдиқланди:

• референдумда овоз берувчи фуқаролар рўйхатига киритилган Ўзбекистон Республикаси фуқароларининг умумий сони – 19 722 809 нафар;
• овоз бериш бюллетенларини олган фуқароларнинг сони – 16 667 097 нафар;
• овоз беришда иштирок этган фуқароларнинг сони – 16 667 097 нафар ёки овоз берувчи фуқаролар рўйхатига киритилган Ўзбекистон Республикаси фуқароларининг умумий сонидан 84,51 фоиз;
• референдумга қўйилган масала бўйича ёқлаб “Ҳа” деб берилган овозлар сони – 15 034 608 ёки овоз беришда иштирок этган фуқароларнинг 90,21 фоизи;
• референдумга қўйилган масалага қарши “Йўқ” деб берилган овозлар сони – 1 558 817 ёки овоз беришда иштирок этган фуқароларнинг 9,35 фоизи;
• ҳақиқий эмас деб топилган овоз бериш бюллетенларининг сони – 73 672 та.

Комиссия ўз қарорини ижрога қаратиш учун Олий Мажлис палаталари ва президентга юборади.

KUN.UZ